Prof. Beyene Petros Interview 2

ሰላምና የሕግ የበላይነት ለዜጎቻችን ይረጋገጥ በቡራዩ ከተማና አከባቢ ነዋሪዎች ላይ የተፈጸመ ጥቃት

በቡራዩ ከተማና አከባቢው በሚኖሩ ሰላማዊ ዜጎች ላይ በማንነታቸው ምክንያት የተፈጸሙ አሰቃቂ ጥቃቶችን አጥብቀን እናወግዛለን፡፡

ከኢትዮጵያ ሶሻል ዴሞክራቲክ ፓርቲ የተሰጠ መግለጫ

የኢትዮጵያ ሕዝብ በአሁኑ ወቅት የኢህአዴግ አምባገነናዊ አገዛዝ ጭኖበት የቆየውን የከፋፍለህ ግዛ ፖሊሲ አስወግዶ
በእኩልነት፣ በመተባበርና በአንድነት የጋራ ሀገሩን ለመገንባት የለውጥ ሂደት ጀምሮ እየተንቀሳቀሰ ይገኛል፡፡
ይሁን እንጂ ይህንን የሰፊውን ሕዝባችንን ፊላጎት በሚጻረር ሁኔታ በብዙ የሀገራችን አከባቢዎች በማንነት ላይ
ያተኮሩ አስከፊ ጥቃቶች በዜጎቻችን ላይ እየተፈጸሙ ይገኛሉ፡፡ ኢሶዴፓ መንግሥት እነዚህን ጥቃቶች በአስቸኳይ
ለማስቆም የሚያስችሉ እርምጃዎችን በመውሰድ የሕግ የበላይነትን እንዲያረጋግጥና የሕዝባችንን ሰላምና ደህንነት
እንዲያስጠብቅ በተደጋጋሚ ባወጣቸው መግለጫዎች ሲያሳስብ መቆየቱ ይታወሳል፡፡ ሆኖም ግን ችግሩ በለውጡ ሂደትም
መፍትሔ ሳያገኝ በአንዳንድ አከባቢዎች ተባብሶ ቀጥሎ ይገኛል፡፡

በዚሁ ሁኔታ መሥከረም 4 እና 5 2011 ዓ ም በቡራዩ ከተማና አከባቢው ተሰባስቦ በአስከፊ የወንጀል ተግባር
ላይ የተሰማራውና ለጊዜው በማን እንደ ተደራጀና እንደ ተመራ ያልታወቀ ኃይል በማንኛውም የፖለቲካ እንቅስቃሴ
ውስጥ ያልነበሩትን ዜጎች በብሔር ብሔረሰብ ማንነታቸው ምክንያት ብቻ እየለየ የግዲያ፣ የዘረፋ፣ የማቁሰልና
የአስገድዶ መድፈር አስከፊ ጥቃቶችን ፈጥሞባቸዋል፡፡ በዚህም ምክንያት እስከ አሁን በተገኘው መረጃ ከ30 በላይ
ዜጎች ሲገደሉ በርካቶች ቆስለዋል፡፡ አስከ አሁን የት እንደደረሱ የማይታወቁም ይገኛሉ፡፡ ከፍተኛ የንብረት
ዘረፋም ተፈጽሞአል፡፡ በሰላማዊ ዜጎቻችን ላይ ለሁለት ተከታታይ ቀናት በሀገራችን ዋና ከተማ አጠገብ በሚትገኘው
የቡራዩ ከተማ ጥቃቱ ሲፈጸም ችግሩ እንደተከሰተ የመንግሥት የጸጥታ ኃይሎች ወንጀሎቹን ለማስቆም የሚያስችል
ፈጣንና በቂ እርምጃ ባለመውሰዳቸው ችግሩ እየሰፋ ሊሄድ እንደቻለም  ለመረዳት ችለናል፡፡

የኢትዮጵያ ሶሻል ዴሞክራቲክ ፓርቲ እነዚህን በሰላማዊ ዜጎቻችን ላይ የተፈጸሙትን ኢሰብአዊና ዘግናኝ ወንጀሎችን
በጥብቅ እያወገዘ መንግሥት ወንጀለኞቹን በሙሉ ተከታትሎ ለሕግ እንዲያቀርባቸው አጥብቆ ይጠይቃል፡፡ የወንጀሎቹ
ሰላባ የሆኑት ዜጎቻችን ለተፈጸመባቸው ግፎች ትክክለኛ ፍትሕ እንዲያገኙ፣ ከቤት ንብረታቸው የተፈናቀሉት ተመልሰው
እንዲቋቋሙና ለወደመባቸውና ለተዘረፈባቸው ንብረትም ተገቢውን ካሳ እንዲያገኙ እንዲደረግ፣ እንደዚሁም ለወደ ፊቱም
ተመሳሳይ ጥቃቶች በሰላማዊ ዜጎቻችን ላይ እንዳይፈጸሙ ለመከላከል የሚያስችሉና ከአስነዋሪው ጥቃት በስተጀርባ
ሆነው ወንጀሎችን በማደራጀትና በመምራት ተግባር የተሳተፉ ኃይሎች ላይ ሕጋዊ ማጣራት ተደርጎ ተገቢ እርምጃዎች
ሁሉ በመንግሥት በኩል በአስቸኳ እንዲወሰዱ አጥብቀን እናሳስባለን፡፡

ሰላምና የሕግ የበላይነት ለዜጎቻችን ይረጋገጥ፡፡

ድል ለሰላማዊና ሕዝባዊ ትግላችን፡፡

የኢትዮጵያ ሶሻል ዴሞክራቲክ ፓርቲ

መሥከረም 7 ቀን 2011 ዓ ም

አዲስ አበባ

Posted in News, Press Releases.